ABŞ kəşfiyyatının hazırladığı son hesabatda ABŞ və İsrailin fevralın 28-dən başlayan genişmiqyaslı hücumlarına baxmayaraq, İran hakimiyyətinin çöküşünə dair hələlik heç bir əlamətin olmadığı bildirilib.
Bu barədə CNN məlumat yayıb.
Nəşr yazır ki, kəşfiyyat məlumatları bombardmanlar nəticəsində Ali Rəhbər və onlarla yüksək rütbəli rəsminin həlak olmasına, ölkənin raket potensialının ciddi zərər görməsinə rəğmən, Tehran hökumətinin hakimiyyətini qorumaq gücünə malik olduğunu göstərir:
“Ağ Ev rəsmiləri hərbi əməliyyatların əsas məqsədinin İranın raket, nüvə və dəniz proqramlarını sıradan çıxarmaq olduğunu vurğulasalar da, Prezident Donald Tramp daha sərt mövqe nümayiş etdirir. O, iranlıları 50 ildir hakimiyyətdə olan “terrorçu rejimi” devirməyə çağırıb və İranın “qeyd-şərtsiz təslim olmasını” tələb edib. Tramp hətta qeyd edib ki, bu təslim olma bəyanatını İran tərəfi yox, məhz özü verəcək”.
Qeyd edək ki, hazırda münaqişənin 13-cü günündə tərəflər arasında həm hərbi, həm də diplomatik mübarizə kəskin şəkildə davam edir.(qafqazinfo)
